Кукмара мәдрәсәсе каршында “Балаларга һәм олыларга өстәмә  белем бирү” юнәлешендә эшләп килүче Башлангыч бүлекнең якшәмбе мәктәбендә “Әлифба бәйрәме” дип аталаган күркәм чара үткәрелде. Гарәп хәрефләрен инде тулысынча үзләштергән 1 нче сыйныф кызлары һәр хәрефкә багышланган кыска шигырьләр башкарды, укытучылар тәкъдим иткән гарәп сүзләрен тактага язды, бәйге төсендә узган уеннарда да катнашты. Чара ахырында укучыларга бүләкләр тапшырылганнан соң, чәй мәҗлесе оештырылды.

20 сентябрь көнне Кукмара мәдрәсәсендә быел укырга керүчеләр өчен беренче оештыру җыелышы үткәрелде. Чара илебездәге эпидемиологик вәзгыятьне исәпкә алып, санитар нормаларны үтәп үткәрелде.

   Җыен Коръән укып дога кылудан башланды. Аннары сүз Кукмара районы мөхтәсибе ярдәмчесе Айрат хәзрәт Шәфигуллинга бирелде. Ул яңа шәкертләрне котлап, аларга дин белеме алуда уңышлар теләде. Читать далее →

   Кукмара  мәдрәсәсе 2020 – 2021 уку елына укучылар кабул итә.

   Мәдрәсәнең һөнәри бүлегенә урта, урта-махсус яки югары белемле ир-егетләр һәм хатын-кызлар кабул ителә. Гомуми дини белем алудан тыш Татарстан Республикасының мәгариф министрлыгы тарафыннан бирелгән Лицензия  нигезендә бу бүлектә имам-хатыйб һәм ислам дине нигезләре укытучысы белгечлекләрен үзләштерергә мөмкин.

   Балаларга һәм олыларга өстәмә белем бирү кысаларында оештырылган Башлангыч бүлеккә динебез нигезләрен өйрәнергә теләүче олылар (яшь чикләнмәгән) һәм балалар (11-12 яшьтән) кабул ителә. Әлеге бүлекнең уку-укыту программасы Ислам дине нигезләрен, Коръән-Кәримне, ислам хокукын, тарихын һәм әхлагын өйрәнүне һәм гарәп теле белән танышуны максат итеп куя.

   Дәресләр атнага 2-3 көн үткәрелә, авылларда, башка район-төбәкләрдә яшәүчеләр өчен якшәмбе көннәрендә уку мөмкинлеге бар.

   Һөнәри бүлектә уку вакыты – 4 ел, башлангыч бүлектә – 3 ел. Мәдрәсәне тәмамлаучыларга диплом бирелә.  

Кирәкле документлар:

   Гариза һәм шәхси мәгълүматны туплаган Анкета (әзер сораулык буенча); паспорт күчерелмәсе (1 нче бит һәм прописка бите); 086 У формасы буенча медицина белешмәсе; 3х4 зурлыгындагы ике фоторәсем (хатын-кызлар яулыктан); дөньяви белем алу турындагы ахыргы документ күчерелмәсе.

      Беренче оештыру җыелышы – 20 сентябрь якшәмбе көнне сәг. 9 да башлана. Шунда уку тәртипләре белән танышырга, вәгазь тыңларга мөмкин булачак.

   Белешмәләр өчен тел.:  8(84364) 2-66-75,  89656026757.