Чыгарылыш шәкертләре Диплом эшләрен яклады

Кукмара мәдрәсәсенең һөнәри бүлеген тәмамлаучы шәкертләр уку-укыту программасында каралган ахыргы сынау аша уздылар: аларга мөгаллимнәрдән торган комиссия каршында Диплом эшләрен якларга туры килде. Мәдрәсәне тәмамлаучы укучыларның әлеге хезмәтләре 4 еллык  уку  дәверенә үзенчәлекле бер нәтиҗә буларак каралды: үз хезмәтен яклаганда шәкертләрнең сөйләм осталыгы һәм фикерләү сәләте генә түгел, сайлап алынган тема ни дәрәҗәдә тирән өйрәнгәнлеге дә ачык күренде, шулай ук аларның дин әһеленә хас булырга тиешле сыйфат-күнекмәләрне ни дәрәҗәдә үзләштергәннәре ачыкланды.

Диплом эшләре темаларына килгәндә, быел ислам дине һәм шәхес, ислам һәм җәмгыять  юнәлешендәге темаларга өстенлек бирелгән иде. Мөгаллимнәрдә аеруча зур кызыксыну уяткан темалардан “Хәзерге җәмгыятьтә әхлакый проблемаларны дин ярдәмендә чишү юллары”, “Мөслимә өчен хиҗаб әһәмияте”, “Ислам динендәге йолаларның кешенең рухи һәм бәдәни үсешенә ясаган йогынтысы”, “Коръәндә математика чагылышы”, “Исламда зыялылык төшенчәсе” кебек темаларны билгеләп үтәргә мөмкин.

Комиссия әгъзалары  быелгы чыгарылыш шәкертләренең ( ә алар быел 17: 12 ир һәм 5 хатын-кыз) Диплом эшләрен, тулаем алганда, уңай бәяләделәр.

Кукмара мәдрәсәсендә Коръән укучылар бәйгесе үткәрелде

Март аеның ахыргы шимбә көнендә Кукмара мәдрәсәсендә инде күркәм гадәткә әверелгән дини бәйге үткәрелде. Инде 25 елдан артык үткәрелеп килүче Коръән укучылар бәйгесе башка төбәкләрдә оештырыла торган шундый ярышлардан гомум халык катнашуы белән аерылып торадыр, чөнки әлеге бәйгедә бернинди яшь  чикләүләре булмаган рәвештә һәркем катнаша ала. Менә быел да Аллаһ Китабына багышланган чарада олысы да, кечесе дә катнашып, чара чын бәйрәм төсендә үтте. Иң куандырганы – бәйгедә яшьләр күп иде. Ә инде иң яшь һәм өлкән  катнашучылар буларак Кукмарадан 2 яшьлек Ганиева Нәфисә һәм Вахит авылыннан 72 яшьлек Гыйльфанов Минневакыйф билгеләп үтелделәр.

Яшь буенча катнашучылар шундый төркемнәргә бүленде: 7 яшькә кадәрге сабыйлар; 8 – 11 яшьлек балалар; 12 – 17 яшьлек яшүсмерләр; 18 яшьтән башлап олылыр. Ир-егетләр һәм  хатын-кызлар аерым ярышып, түбәндәге номинацияләр буенча осталыкларын күрсәтте: 5, 10 һәм 20 сүрәне яттан белү; “Йәсин” һәм “Мүлк” (“Тәбәрак”) сүрәләрен яттан белү.

Быелгы конкурста барлыгы 245 кеше катнашты: 112 ир-егет (89 малай һәм 23 ир-ат) һәм 133 хатын-кыз (101 кыз бала һәм 32 хатын-кыз). Төрле номинацияләр буенча барлыгы 90 призлы урын билгеләнде, призлы урын алган һәр катнашучыга яхшы бүләк тапшырылды, ә һәрбер катнашучы балага канцеләрия әйберләреннән торган җыелма, олыларга исә бер кап чәй белән китап тапшырылды.  Моннан тыш балаларга “Ифтарга күчтәнәч” дигән язу ябыштырылган тәм-томнар пакеты да бирелгән иде.

КУКМАРА МӘДРӘСӘСЕНДӘ “ШӘКЕРТЛӘР БӘЙГЕСЕ” ҮТКӘРЕЛДЕ

Шушы көннәрдә Кукмара  мәдрәсәсенең кичке бүлегендә белем алучы  ир-егетләр төркемнәре арасында “Шәкертләр бәйгесе” дип исемләнгән файдалы да, күңелле дә чара үткәрелде. Бәйгедә 1 нче, 2 нче, 3 нче һәм 4 нче курс шәкертләре шундый номинацияләр буенча үзара ярышты:

   1) Таныштыру (һәр командада катнашкан 5 шәкертнең һәрберсе үзе белән шигъри юллар аша таныштырды).

   2) Коръән уку (шәкертләр программа буенча ятланырга тиешле сүрәләрне яттан укып күрсәтте).

   3) Коръән сүрәләренең саны (һәр төркем экранда күрсәтелгән 5 сүрәнең эчтәлектәге санын әйтеп бирергә тиеш булды).

   4) Мини-викторина (шәкертләр мәдрәсәдә өйрәнелә торган берничә фән буенча сорауларга җавап бирделәр).

   5) Гыйбрәтле нәсыйхәт (һәр төркем нинди дә булса тәрбияви эчтәлеккә ия булган хикәятне 5 минутлык вәгазь яки сәхнә күренеше итеп тәкъдим итте).

   6) Дин әһелләрен фото буенча тану (экранда күрсәтелә торган фотосурәт буенча һәр төркем хәзерге 5 татар дин әһелен танып, аларның исемен әйтеп бирде) .

   7) Безнең  остазлар (экранда күрсәтелә торган балачак фотосурәте буенча бәйгедә катнашучы төркемнәр үз остазларын танырга тиеш булды).

   Шәкертләрне мәдрәсә мөгаллимнәреннән торган жюри бәяләде. Ул нәтиҗә чыгарган арада тамашачылар өчен Викторина үткәрелде. Ахырда жюри  рәисе – Кукмара районы имам-мөхтәсибе Рәдиф хәзрәт Тимергалиев шәкертләрне һәм тамашачыларны гомум нәтиҗә белән таныштырды. Барлык балларны кушканнан соң беренче урынга 1 нче курс шәкертләре лаек булганы ачыкланды. Икенче урында – 4 курс, өченче урын исә ике төркемгә – 2 нче һәм 3 нче курс  шәкертләренә бирелде. Барлык катнашучыларга кыйммәтле бүләк һәм күчтәнәчләр тапшырылды. Бәйге күмәк чәй мәҗлесе белән тәмамланды.