Архив автора: ilgis

Кукмарада дини бәйгеләр үткәрелде

Май ае башында ял көннәре булудан файдаланып, Кукмара шәһәрендә ике дини ярыш – Коръән һәм намаз укучылар бәйгеләре үткәрелде. Район мөхтәсибәте һәм Кукмара  мәдрәсәсе тырышлыгы белән үткән чараларда барлыгы 200 ләп кеше катнашты.

Намаз укучылар бәйгесе Кукмара Үзәк мәчете бинасында узды. Әлеге конурста балалар гына катнашты. Алар шундый төркемнәргә бүленде:

 Беренче төркем – мәктәпкәчә яшендәге һәм 1 — 2 сыйныф балалары. Шушы төркем өчен куенлган шарт буенча балалар 2 рикәгатьле намаз укып күрсәтергә һәм кыска сорауларга җавап бирергә тиеш булды.

   Икенче төркем – 3 — 4 сыйныф балалары. Шарты – 5 вакыт намазлар арасыннан берсен укып күрсәтү, “Кунут” догасын, “Аятелкөрси”не һәм иман шартын белү, кыска сорауларга җавап бирү.

   Өченче төркем – 5 — 6 сыйныф балалары. Шарты – 5 вакыт намазлар арасыннан берсен укып күрсәтү, “Кунут” догасын, “Аятелкөрси”не, Азанны, азан догасын һәм “Аллаһүммә тәкаббәл” догасын, шулай ук 44 фарызны, иман шартын һәм “Фатиха” сүрәсенең тәфсирен белү, кыска сорауларга җавап бирү.

   Малайлар һәм кызлар аерым төркемнәрдә ярышты. Һәр катнашучыга күчтәнәч бирелде, бәйгедә җиңүчеләргә исә Диплом һәм бүләк тапшырылды.

=====

Коръән укучылар бәйгесе Кукмара  мәдрәсәсе бинасында үтте. Әлеге бәйгедә түбәндәге номинацияләр билгеләнгән иде:

  1. 5 һәм әзрәк сүрәне яттан белү (балалар өчен);
  2. Коръәннең ахыргы 10 сүрәсен яттан белү (“Фил”дән “Нәс”кә кадәр);
  3. Коръәннең ахыргы 20 сүрәсен яттан белү (“Әддухә”дән “Нәс”кә кадәр);
  4. “Йәсин” һәм “Тәбәрак” сүрәләрен яттан белү.

   Ир-егетләр һәм хатын-кызлар  аерым  төркемнәрдә ярышты. Барлык катнашучыларның Коръән ятлау осталыгына мәдрәсә мөгаллимнәре бәя бирде. Елдагыча, һәр сөйләүчегә күчтәнәч, ә инде призлы 1-2-3 нче урын алучыларга кыйммәтле бүләк тапшырылды. Бүләкләр иганәчеләр һәм Аллаһның  рәхмәтенә ирешеп әҗер-савапка ия булырга теләүче дин кардәшләребез көче белән әзерләнде. Оештыручылар да, катнашучылар да канәгать калып, Аллаһның ризалыгын өмет итеп таралыштылар.

Нурсинә Курамшина, КФУның

журналистика факультеты студенты.

Кукмара мәдрәсәсендә “Мөслимәләр бәйгесе” үткәрелде

Кукмара мәдрәсәсендә  инде күркәм гадәткә әверелгән кызыклы чара  – “Мөслимәләр бәйгесе” дип аталган ярыш-викторина үткәрелде. Әлеге чарада төрле төркемнәрдә белем алучы 3 нче курс талибәләре катнашты. “Тугрылык”, “Сабырлык”, “Тырышлык” һәм “Татулык” дип аталган 4 төркем бәйге программасы буенча каралган 7 турда  белемнәрен һәм осталыкларын күрсәтте. Чара илебездә игълан ителгән “Гаилә елы” һәм Татарстан Республикасы мөселманнарының Диния Нәзарәте игълан иткән “Хәләл тормыш рәвеше елы” шигаре астында үтте.

 “Таныш булыйк” турында барлык командалар әһелләре үз-үзләре белән таныштырса, башка турларда катнашучыларга зирәк-зиһеннәрен эшкә җигәргә туры килде.

“Иман шартын беләсезме?” дип исемләнгән турда һәр төркемнең бер вәкиле 7 иман шартын яттан сөйләп чыгарга тиеш иде.

“Сорау сездән – җавап бездән” номинациясендә командаларга җирәбә буенча эләккән хәдискә шәрех-аңлатма бирәсе булды. Тәкъдим ителгән хәдисләр эчтәлеге гаилә темасы белән бәйле иде.

“Тел күрке – сүз белән” дип аталган ярышта барлык төркемнәргә бер үк бирем бирелде: “кабаланганда” сүзендәге хәрефләрдән мөмкин кадәр күбрәк сүзләр җыярга. Шушы турда җиңгән “Сабырлык” командасы барлыгы 36 сүз җыя алды!

“Яулыкларда милли төсмерләр” дигән турда катнашучылар татар милли бизәкләр төшерелгән яулыкларны ябып күрсәтте. Бәйгенең шушы өлеше аеруча күркәм булып, мөселманча татар милли киемнең никадәр үзенчәлекле һәм матур булуын исбатлады.

“Кем зирәк?” номинациясе барышында командалар кызыклы, уен-көлкене һәм тапкырлыкны таләп итүче сорауларга тиз арада җавап бирергә тиеш иде.

“Күркәм әхлак – хәләл тормыш нигезе” дип аталган турда исә командалар вәкилләре татар язучыларының әхлак темасын яктырткан әсәрләрдән үгет-нәсыйхәт бирүче өзекләр укыды. Бәйгенең бу өлеше күңелләрнең нечкә кылларын тибрәтеп, тамашачыларны да, жюри әгъзаларын да уйланырга мәҗбүр итте.

Жюри дигәннән, конкурсның хөкемдарлары вазифасын Фәниябикә Җәләлиева, Рәмзия Хөсәенова һәм Сәкинә Нәҗипова кебек тәҗрибәле абыстайлар башкарды.

Барлык төркемнәр дә бик яхшы чыгыш ясаганлыктан, нитиҗә урынлап түгел, ә номинацияләп ясалды. “Зәвыклы мөслимәләр” булып “Татулык” төркеме талибәләре танылды. “Сөйләм остабикәсе” исеме “Тугрылык” командасына бирелде. “Сабырлык”  төркеме  “Зирәкбикәләр” буларак билгеләп үтелсә, “Тырышлык” төркеме “Кукмара остазбикәсе” исеменә лаек булды.

Ахырда барлык катнашучыларга бүләкләр тапшырылды. Бәйге мул табынлы чәй мәҗлесе белән тәмамланды.

 

Кукмара мәдрәсәсе үзенең 25 еллык юбилеен билгеләп үтте

Җөмәдәл-әүвәл аеның 29нчы көнендә (13нче декабрьдә), Кукмара шәһәре Мәдәният йортында Кукмара мәдрәсәсе оешуның 25 еллыгы уңаеннан зурлап тантана үткәрелде. Әлеге чарада төрле дәрәҗәдәге җитәкчеләр, уку йортын тәмамлаган шәкертләр, мөгаллимнәр, дин әһелләре, район халкы катнашты.

Урта һөнәри дини уку йортының чирек гасыр дәвамында күркәм нәтиҗәләргә ирешү сөенечен бүлешү кичәсенә Татарстан мөфтиенең беренче урынбасары Илфар хәзрәт Хәсәнов килде. Ул барлык катнашучыларга мөфти Камил хәзрәт Сәмигуллинның сәламнәрен ирештерде, район җитәкчелегенә һәм мөхтәсибәткә, шулай ук мәдрәсә коллективына рәхмәт сүзләрен һәм изге теләкләрен җиткерде, мәдрәсәнең киләчәктә дә зурдан-зур уңышларга ирешүен теләде. Мөфти урынбасары Кукмара мәдрәсәсе директоры Ришат Курамшинны исламны үстерүгә, дини һәм милли кыйммәтләрне саклауга, рухи мирасны өйрәнүгә, мөселман мәгарифен үстерүгә керткән өлеше, дини һәм хәйрия эшчәнлегендәге казанышлары өчен Нәзарәтнең Мәрҗани медале белән бүләкләде, күп еллар дәвамында хезмәт куючы мөгаллимнәргә медальләр һәм рәхмәт хатлары тапшырды. Әлеге тантанада катнашучылар арасында Татарстанның баш казые Җәлил хәзрәт Фазлыев, Болгар ислам академиясе ректоры Фәрхәт Хөснетдинов, “Мөхәммәдия” мәдрәсәсе җитәкчесенең беренче урынбасары Рөстәм хәзрәт Хәйруллин, шулай ук Мамадыш, Урыссу мәдрәсәләре җитәкчеләре, Россия ислам институты, Ислам динен кабул итүгә 1000 ел исемендәге Казан югары мөселман мәдрәсәсе вәкилләре бар иде.

Юбилейга багышланган чарада мәдрәсәнең эшли башлавы, уку йорты өчен Үзәк мәчет янәшәсендә бина салыну тарихы искә алынды, мәдрәсәне тәмәмлап дин юлында хезмәт итүче хәзрәтләрнең һәм мөгаллимнәрнең нәсыйхәтләре тыңланды, гыйлем учагы эшчәнлеге, уку йортында оештырыла торган белем бирү һәм тәрбия чараларына нәтиҗәләр ясалды.

Кукмара мәдрәсәсенең чишмә башы узган гасырның 90нчы елларына барып тоташа: районның Үзәк мәчете ачылуга ук биредә дин сабаклары бирү эшенә тотыналар. 1994-1998нче елларда Кукмара Үзәк мәчете каршында якшәмбе мәктәбендә ислам дине нигезләрен укыту башланып китә. 1998нче елдан, Кукмара мәдрәсәсе дини уку йорты буларак рәсми рәвештә теркәлгәч, дәресләр берничә өлешкә бүленгән мәчет залларында үткәрелә, ә 2008нче елда исә халык көче белән мәдрәсә өчен заманча өч катлы бина төзелә. 25 ел дәвамында ике меңгә якын шәкерткә гыйлем бирелә. Уку йортын ачылган көннән башлап Ришат хәзрәт Курамшин җитәкли.

Башка дини уку йортлары арасында бу мәдрәсә үзенең халыкчан юнәлеше һәм асыл милли йөзе белән аерылып тора. Биредә беренче көннән алып хәзергәчә белем бирү бары татар телендә алып барыла. Укучылар – Кукмара җирлегеннән тыш, якын-тирә районнардан һәм Киров өлкәсеннән җыела. Алар арасында, башлангыч дини белем алырга теләүчеләр белән беррәттән, авыл мәхәлләләрендә имам, абыстай һәм ислам дине нигезләре укытучысы булырга теләгән милләттәшләребез дә байтак. Мәдрәсәдә дини һәм дөньяви белемгә ия булган тәҗрибәле остазлар хезмәт итә. Алар арасында урта махсус һөнәри мәдрәсәләр өчен эшләнгән бердәм уку-укыту стандартларын булдыруда катнашкан мөгаллимнәр дә бар. Мәдрәсә укытучылары тарафыннан төзелгән “Башлангыч мәдрәсәдә өйрәнелә торган сүрәләр һәм догалар”, “Ислам дине нигезләре”, “Тәҗвид” дәреслеге кебек әсбаплар исә республикабыз мәчетләрендә ислам дине нигезләре курсларында уңышлы файдаланыла.

Уку йортында ел саен төрле мәдәни чаралар, шәкертләр бәйгеләре, викториналар һ.б. үткәрелә. Раббыбыз Аллаһы Тәгалә Кукмара мәдрәсәсе эшенә Үз рәхмәтен һәм бәрәкәтен салып, әле озак еллар дәвамында республикабызның дини мәгариф системасында уңышлы эшләргә насыйп итсен!