5 август көнне Кукмара районына Бөтендөнья татар конгрессының VI корылтае делегатлары килде. Кунаклар район тормышы – авыл хуҗалыклары, сәнәгать оешмалары эшчәнлеге белән танышты, җирле мәдәният вәкилләре, һәвәскәр артистлар чыгышларын тамаша кылды. Мәдәни программада Кукмара мәдрәсәсен зиярат кылу да каралган иде. Биредә корылтай делегатларын Кукмара районы имам-мөхтәсибе Рәдиф хәзрәт Тимергалиев һәм мәдрәсә мөдире Ришат хәзрәт Курамшин каршы алып, райондагы дини мәгариф халәте, мәчетләр һәм мәдрәсә эшчәнлеге белән таныштырды, кунакларны кызыксындырган сорауларга җавап бирде.

3 — 13 июль көннәрендә Кукмара мәдрәсәсендә мәктәп яшендәге балалар (8-15 яшьлек малайлар һәм кызлар) өчен көндезге лагерь эшләде. Җәйге ялны оештыру, балаларны ислам нигезләре белән таныштыру, дини — әхлакый тәрбия бирүне максат итеп куйган лагерьда 100 ләп бала катнашты. Дини белемнәре буенча төрле төркемнәргә бүленгән балаларга махсус төзелгән программа буенча дәресләр бирелде, вәгазьләр сөйләнде. Балалар өчен шулай ук спорт уеннары, мәдәни чаралар һәм хәләл туклану да оештырылды. Лагерьга бер дога, бер гарәп хәрефен дә белмичә килүчеләр арасында тәһарәт, намаз тәртибен, гарәп әлифбасын өйрәнүчеләр байтак булды.

13 июль көнне лагерьны ябу чарасына балалардан тыш әти-әниләр, әби-бабайлар да күпләп җыелган иде. Җыен башында малайлар азан әйттеләр, Коръән сүрәләрен укып күрсәттеләр, дога кылдылар. Соңыннан һәр төркем тамашачылар алдында чыгыш ясап, дини шигырьләр сөйләде, җырлар башкарды, әдәп-әхлак темасына багышланган театральләшкән тамаша күрсәтте.

Лагерь дәвамында белем алуда уңышка ирешүчеләр өчен 1 яки 5, яки 10 баллы “Тырыш шәкерткә” дип исемләнгән медальоннар бирелеп барды. Иң күп балл җыючыларга, шулай ук дини рәсем, кул эшләре конкурсларында призлы урынга лаек булучыларга бүләкләр бирелде.

Бик тә кызыклы, күңелле үткән чарада лагерьга йөрүче балаларның һәммәсенә дә тәм-том, китап һәм мәктәп кирәк-яракларыннан торган пакет тапшырылды. Мөгаллимнәргә рәхмәт сүзләре җиткереп: “Бирегә киләсе елга да килербез!” – дип вәгъдә биреште балалар, бер берсе белән саубуллашканда.

Кукмара мәдрәсәсендә – чыгарылыш

(Фотолар да бар)

17 майда Кукмара мәдрәсәсендә быелгы чыгарылышка багышланган мәҗлес үткәрелде.Мәҗлеснең тантаналы өлеше чыгарылыш шәкертләренә дипломнар тапшыруга багышланган иде. Быел мәдрәсәнең һөнәри бүлеген 41 шәкерт тәмамлады: ир-егетләр 21 кеше, хатын-кызлар исә – 20. Алар барысы да 4 еллык уку-укыту программасын үзләштереп, чыгарылыш имтиханнарын тапшырдылар һәм Диплом эшләрен якладылар. Ир-егетләргә “Имам-хатыйб”, ә хатын-кызларга “Ислам нигезләре мөгаллимәсе” квалификациясе бирелүен раслый торган дипломнар тапшырылды. Алар арасында инде хәзер дин өлкәсендә хезмәт итүчеләр – имамнар һәм мәхәлләләрендә дин белеме бирүче мөгаллимнәр бар.

Һөнәри бүлектән тыш, быел мәдрәсәнең башлангыч бүлеген тәмамлаучылар да булды. Алар арсында өлкәннәр дә, якшәмбе мәктәбендә белем алган балалар да бар. Башлангыч бүлекне 23 ир-егет һәм 50 хатын-кыз тәмамлады (шулар арасында 24 яшүсмер).

Быелгы чыгарылышка багышланган тантанада Татарстан Республикасының Диния Нәзарәте вәкиле буларак мөфтиятнең Коръән бүлеге мөдире Илнур Хәйруллин катнашты. “Мәдрәсәдә укуны тәмамлап диплом алуга ирешү — бер яктан караганда сөенечле вакыйга, икенче яктан исә бик моңсу да, — диде Илнур хәзрәт, — чөнки бер хәдистә “Гыйлем алучы кеше өчен барлык мәхлукат, хәтта судагы балаклар да дога кылыр, ул кешене зикер итәр” дигән хәбәр килә, гыйлем алудан туктадың икән, барча мәхлукат сине зикер кылудан туктый кебек… Шуңа күрә гомер азагына кадәр бик тә файдалы, мавыктыргыч һәм нурлы гыйлем юлыннан һич тә читләшмәгез, гыйлем алуны беркайчан да туктатмагыз” – дип мөрәҗәгать итте шәкертләргә мөфтият вәкиле.

Тантанага җыелган шәкертләр һәм мөгаллимнәр алдында шулай ук Кукмара Үзәк мәчете имамы Әхтәм хәзрәт Мөбарәкшин, район имам-мөхтәсибе Зиннур хәзрәт Сәмигуллиннар да вәгазь-нәсыйхәтләре белән чыгыш ясады. Алар дини гыйлем алуның фазыйләтләрен искәртеп, шәкертләргә белгәннәре белән гамәл кылырга һәм алга таба тагын да зуррак максатлар куярга киңәш иттеләр. Әхтәм хәзрәт: “Белмәгәнеңне белү – гыйлемнең яртысы”, — дип билгеләп үтсә, Зиннур хәзрәт: “Гыйлемнең башы ул – Аллаһны тану, ә гыйлемнең ахыры ул – һәрбер хәлне Аллаһка кайтару”, — дигән хикмәт ияләренең фикерен китерде.

Чыгарылыш шәкертләренең һәммәсенә дә Татарстан Диния нәзарәте тарафыннан ярдәм итеп бирелгән китаплар һәм вәгазь дискылары тапшырылды. Шул уңайдан Татарстан Мөфтие Камил хәзрәт Сәмигуллинга һәм Диния Нәзарәтенең Аппарат җитәкчесе Ришат әфәнде Хәмидуллинга мәдрәсә җитәкчелеге исеменнән олы рәхмәтебезне белдерәбез. Шактый кыйммәтле бүләкләрен мәдрәсә коллективына тапшырган Кукмара “Металл савыт-сабалар заводы” оешмасы генераль директоры Азат Ясави улы Заһидуллин адресына да иң изге теләкләребезне, җылы рәхмәт сүзләребезне юллыйбыз. Һәрбарчагызның да эшегез уң булсын, Аллаһ Раббыбыз ярдәменнән ташламасын.

Өйлә намазы укылганнан соң чыгарылышка багышланган чара укучылар оештырган мул табын алдында дәвам ителде. Мәҗлеснең әлеге өлешендә дә шәкертләр мөгаллимнәргә ихластан олы рәхмәтләрен җиткерделәр, үзләре язган шигырьләрен укып, максатка ирешү шатлыгын һәм мәдрәсәдән аерылу белән бәйле моң-сагышлы хисләрне чагылдыручы уй-фикерләре белән уртаклаштылар. Мөгаллимнәр исә шәкертләргә тормыш юлын Аллаһ кануннарына ныклап тотынып, дини уку йорты – мәдрәсә тәмамлаган шәкерт дәрәҗәсенә тугрылыклы һәм лаеклы булып узарга, Аллаһы Тәгалә мөэминнәргә әзерләгән гәҗәеп Җәннәтендә дә очрашырга насыйп булсын дигән изге теләкләрен җиткерделәр.

Кукмара мәдрәсәсе директоры

Ришат хәзрәт Курамшин.